Filme, Sächsisch, Chinesisch-Klausur
mood: 
tired
tiredAsso gesdorn war Mittwoch, da hadde de Anja aus Schinejs'sch de Idee, dassmer dor Alexandra, die bei uns is Schinejs'sch-Dudorjum macht, ma' örschndwie 'ne Kleen'schkeit schenk'ng könnt'n. Hammer dann och gemacht, da simmer in de Uni-Büscherei gegang' un' ham der da so ä cooles leeres Reinschreibebuch rausgeguckt, was so ä bissl wie asiadisch aussieht. Nujoa, hammer der dann nach'm Underrischt gegehm, hat'se sich nadürlisch gefreit wie's bejse Tier. Dann bin'sch midder ollen
kimura_izumi, dor neddn Svea, dor niedlischn Ulriege, dor putz'schn Stephi (die so kleen un' biebslisch is) in de Mensa gegang'. Ä bissl späder kam dann ooch de Dingsrischs hier,... de... na... na orh hier... Garolin oder wiese heeßt, na off jeden Fall die eene aus'm Japaanisch-Kurs vond'n andorn un' de Dschuang Jänn (庄妍, Zhuāng Yán), mit der'sch misch dann ä bissl undorhaldn habbe. Abber de Ulriege hab'sch, hier, wegen Säggs'sch ausgefraacht un' dann hab'sch'se ma' so ä bissl versucht, Erzgebörg'sch redn ze lassn, was'sch örschndwie dodaal lusdisch fand. Die hat immer so á (hoher Don) und à (diefer Don) für "och" und "an" gesaacht. Un' übberhaupt, hab'sch mir och ä paar Sätz'schn offgeschriem. Muss'sch späder ma' hier posten. Dann, wo die andorn widder wegwarn, hab'sch halt midder Jänn geredet, die meinde, dass meine schinejs'sche Schrift übelst gut aussieht. Die hat sogar gesaacht, dasses besser aussehn täte als vom Sebastschahn de Schrift. Na un' der war een oder zwee Jahre dort, in Schiena, höj? Naja, mer ham ma' Adressen un' Delefonnummern ausgetauscht un' se hat gesaacht, dasse mir ma' 'ne Feh-Wong-CD brenn' will.Ahms hatt'sch misch dann mitter
Laura un' dor Kathleen getroffm gehabt, weil mer wolldn ja in de Villa zum Spieleahmd. De Yvonne un' dor Mardin war'n ja och da. Abber das war übelst scheiße, wei'sch hab ja keene Orientierung un' nüschte, da simmer erschtema' in de falsche Straßnbahn eingestieschn un' sinn dann örschndwo am Zoo widder rausgekomm', orh nee... un' als ob das nisch schonn peinlisch genuch für misch war, simmer och noch falsch geloofm, wei'sch örschndwie gedacht hab, de Villa wär in dor Leibnizstraße, isse abber garnisch! Is mir dann abber ze späte eingefalln, naja. Abber mer sinn wehnstn angekomm', wenn och ä bissl späte. Gespielt hammer Kehmbridsch Mao, un' der Dingstyp da war och da, weeß'sch schon garnisch mehr wie der hieß, und die eene, die och noch in dor Schule is, die mit'n rodn Haarn, war och da, weeßte wie? War ganz lusdisch am Anfang, abber dann ham Yvonne un' Mardin keene Lust mehr gehabt un' dann war's ä bissl langweilig... najoa.Heude war's örschndwie übelst cool, 'schweeß nisch. Schinejs'sch-Glausur hammer geschriem, war abber nisch wörklisch schwer. Ä paar haddn ä bissl Huddelei mitter Zeit, hab'sch mitgekrischt, abber bei mir gings. Müsste eing'sch och alles rüscht'sch ham, kloob'sch ma'. Na ma' sehn. Off jeden Fall bin'sch dann mitter Sophie in de Mensa, womer dann och'n Trisdan getroffm ham. Joa, mit den' hatt'sch dann ä bissl geschnasselt, dann wollt'sch heeme.
Off'm Heimweesch kommtmer da abber de Chrisdina entgeschn, vom Fachschaftsrat, und fraacht misch so, ob'sch zur Demo gehe. Eing'sch wollt'sch ja nisch, aber bin dann doch mit. Die andern sinn dann och gekomm'. War abber'n bissl langweil'sch, war nüscht weider los. Aber'sch hab de Anna-Elisabeth getroffm, die eene Esborandisdin vom Sprachngahmd. Naja, war dann örschndwie vorbei, da bin'sch dann noch mit'm Stefan (Käpt'n Syntax) in so ä asiat'sches Restorang gegang' und der hat's'sch was ze essn gekohft. Hmm, ham übelst übber Fjetnames'sch geredet, war lusdisch, mh.
Dann bin'sch ze Tibejt'sch rübbergemacht, was abber nisch, weil außer mir keene komm' wollte. Da hat misch dann dor Sørensen och gehn lassn. Macht ja nüscht.
Örschndwann is dann och ma, asso assisch dann widder heeme war, dor
Margus vorbeigekomm' un' hat misch abgeholt ze sisch heeme. Da war ooch dor Günni un' dor Pätrick da. Joa... un' ze McDoof simmer och kurzema'.So, das war's kloobe... wollde ma' off Säggs'sch schreim. Aber 'sch muss ma' saachng, dasses ä bissl schwer is, hier konsistent zu bleim. 'Sch kloob, 'sch sollde eher ma' in IPA schreim, wei'sch mir ega nisch sischer bin, was'sch nu' wie schreim soll.
So, 'schbin miede, mir falln klei' de Guck'schn zue... so, 'sch saach dann ma' Tschüssie!
P.S.: 'schwollde ja meine Muddor ma' den Texte da vorlesn lassen, das mit dem "Plies korl Schdella, ask hör to pring sies sings wiss hör from se schdohr...", un' dannema' off IPA offschreim...